Polisi Kanda Maalum Dar wakamata watu 26 matukio ya uvunjaji na dawa za kulevya, watoa onyo kuelekea sherehe za uhuru

Na Hussein Ndubikile, Dar es Salaam

Jeshi la Polisi Kanda Maalum ya Dar es Salaam limewakamata zaidi ya watu 26 wanaojihusisha na vitendo vya uhalifu ikiwemo matukio ya kuvunja na kuiba vitu vya watu pamoja na biashara ya dawa za kulevya aina ya Bangi.

Akizungumza na wanahabari leo jijini Dar es Salaam na Kamanda wa Polisi wa Kanda hiyo Jumanne Muliro (pichani) ambapo amesema watu hao wamekamatwa katika oparesheni kali iliyofanyika kwa wiki mbili na kwamba watuhumiwa wamekutwa na Kompyuta mpakato zaidi ya (9), Gari la wizi moja aina ya Toyota Wish No. T 189 DBZ  na Runinga 15.

" Jeshi la Polisi la Kanda Maalum ya Dar es Salaam katika oparesheni kali zinazolenga kuwakamata wahalifu limewakamata zaidi ya watu ya 26 wanaojihusisha vitendo vya uvunjaji na  kuiba mali  hii yote imefanyika wiki mbili ya oparesheni kali, " amesema Kamanda Muliro.

Amebainisha kuwa katika operesheni hiyo watu wanaofanya biashara ya Bangi wakitumia Bajaj kusafirisha kutoka eneo moja kwenda jingine pamoja na gari linalotumika kubeba mali za wizi zilizokamatwa.

Amesisitiza kuwa watu wote waliokamatwa watafikishwa mahakamani kwa ajil ya kuchukuliwa hatua za kisheria huku akikazia jeshi hilo halitafumbia macho vitendo vya uhalifu.

Katika hatua nyingine, jeshi hilo limetoa tahadhari na onyo kuelekea Sherehe za Miaka 60 ya Uhuru wa Tanzania kwa watu wanaopanga njama au kushiriki kufanya vitendo vya uhalifu litawashughulikia zaidi ya sheria.

Pia Kamanda Muliro amewashukuru wananchi wanaoshirikiana na polisi kutoa taarifa zinazofanikisha kuwakamata wahalifu na kuwaomba waendelee kufanya hivyo kukomesha vitendo vya uhalifu.