Barrick yakana kuchafua maji mto Mara

Na  Mwandshi Wetu

MENEJA mgodi wa dhahabu wa North Mara inaomikikiwa kwa pamoja na Kampuni ya Barrick na Serikali ya Tanzania, Georgia Mutagahywa amesema ofisi yake haihusiki na uchafuzi wa maji ya Mto Mara.

Taarifa ya Uongozi wa mgodi wa Dhahabu wa North Mara unaomilikiwa kwa pamoja na Kampuni ya Barrick na Serikali ya Tanzania umekana kuhusika na uchafuzi wa maji ya mto Mara.

Uongozi wa mgodi huo ulilazimika kutoa taarifa hiyo hivi karibuni baada ya kuwepo kwa uchafuzi wa maji katika mto Mara ukihusisha kemikali ya Zebaki.

Kwa mujibu wa taarifa hiyo, mgodi huo upo mbali zaidi ya kilometa 85 pia Zebaki si sehemu ya orodha ya vitendanishi vya mgodi wao hivyo basi Zebaki inayohisiwa kuwemo mto Mara haitoki kwenye mgodi huo.

Mutagahywa amesema Mamlaka ya Bonde la Maji ya Ziwa Victoria mara kwa mara huchukua sampuli za maji katika maeneo yaliyo jirani na migodi na mgodi wenyewe una mpango madhubuti wa ufuatiliaji wa maji ya ardhini  na hakuna ushahidi wa kuwepo zebaki au uchafu mwingine wowote kwenye maji ndani au karibu na maeneo ya uzalishaji.

"Lakini pia serikali iliunda timu ya wataalamu inayoongozwa na Baraza la Taifa la Usimamizi wa Mazingira (NEMC) ambayo imefanyakazi kwa karibu na Mgodi wa Dhahabu wa North Mara ili kuhakikisha hakuna uchafuzi wa mazingira au maji unaotokea katika mgodi huo na katika maeneo yanayouzunguka," ilisomeka sehemu ya taarifa hiyo iliyotolewa na  Mutagahywa.

Imebainisha pia mgodi huo umefikia lengo muhimu la uhifadhi wa taka zitokanazo a mchakato wa uchenjuaji wa madini kwa kupunguza kiasi cha maji yaliyohifadhiwa kwa kiasi kikubwa kutoka mita za ujazo milioni saba hadi mita za ujazo 800,000 ndani ya kipindi cha miaka miwili, kama ilivyokubaliwa katika Mkataba wa Maelewano na NEMC. 

“Hayo ni mafanikio makubwa, ambayo yanaonesha zaidi dhamira na jitihada za Mgodi wa Dhahabu wa North Mara zinakwenda sambamba kwa kuhakikisha hakuna uchafuzi wa maji au mazingira kwenye Mgodi na maeneo yanayouzunguka,” ilihitimisha hivyo taarifa hiyo.