Na Mwandishi Wetu
Timu ya Taifa ya Wasichana chini ya miaka 17 (Serengeti Girls) imeibamiza mabao (2 -1) timu ya Taifa ya Ufaransa katika mchezo wa pili hatua za makundi, Fainali za Kombe la Dunia nchini India.
Ulikuwa mchezo wakutafuta ushindi kwa udi na uvumba mara baada ya kupoteza mchezo wa kwanza dhidi ya Japan Kwa mabao (4-0).
Mchezo wa Leo Serengeti Girls waliingia kwa nguvu zote kwa kuhanikiza mashambulizi muda wote wa mchezo sambamba na kufanya vitu vya msingi katika dakika zote 90.
Licha ya ubora wa Ufaransa lakini uchanga wa Tanzania katika Fainali hizi ambazo ni kwa mara ya kwanza nidhamu ya mchezo na uwezo wa vijana ulikuwa kivutio kikubwa katika mchezo huo.
Serengeti Girls imejipatia mabao yake yamewekwa kimiani na Diana Mnaly na Christer Bahela kwa mkwaju wa penati.
Kwa matokeo hayo Tanzania inakamata nafasi ya pili nyuma ya vinara Japan walioko nafasi ya kwanza, nafasi ya tatu ikikaliwa na Canada huku Ufaransa wakibuluza mkia.
Mchezo unaofuata Tanzania 'Serengeti Girls' watamenyana na Canada ambapo itahitaji kushinda ama kupata sare kutinga hatua inayofuata.
No comments:
Post a Comment