Suma Lee kutoka na ‘Hawa’

Na Elizabeth John

NYOTA wa muziki wa kizazi kipya nchini, Ismail Seif ‘Suma Lee’ ameachia kibao chake kipya kinachokwenda kwa jina la ‘Hawa’ ikiwa ni mfululizo wa kuwapa burudani mashabiki wake.

Akizungumza na Habari Mseto jijini Dar es Salaam, Suma Lee alisema anamshukuru mungu kibao hicho kimepokelewa vizuri na mashabiki wake na kwamba waendelee kumapa sapoti katika kazi zake.

Suma Lee alisema yupo katika hatua za mwisho za uandaaji wa video ya kazi hiyo ambayo anaamini itafanya vizuri kutokana na maandalizi mazuri pamoja na mazingira ambayo ameyafanyia kazi.

“Namshukuru mungu kazi zangu huwa zinapokelewa vizuri na mashabiki wangu, kitu ambacho kinanipa matumaini ya kuendelea kutunga mashairi ambayo yatakuwa na mvuto kwa mashabiki wangu,” alisema Suma Lee.

Suma Lee alishawahi kutamba na vibao vyake kama, Chungwa, Hakunaga, utanikumbuka na nyinginezo ambazo zilimtambulisha na kufanya vizuri katika vituo mbalimbali vya redio.